Dialogspelet

Aktiviteten legg til rette for at alle elevane kjem til orde, og at dei får øve på å lytte til kvarandre, snakke etter tur, ta stilling, grunngi standpunktet sitt og vurdere ulike perspektiv. 

Aktiviteten er veldig godt eigna for å diskutere komplekse problestillingar der det ikkje nødvendigvis er eitt riktig svar, knytt til f.eks. berekraft og miljø, helse og livsmeistring eller demokrati og medborgarskap. 

Gjennomføring:

• Del elevane i grupper på tre.
• Del ut utstyr til kvar gruppe:
• eit ark med fire ruter merka med «einig», «litt einig», «litt ueinig» og «ueinig» nynorsk | bokmål
• eit sett med påstandar knytte til eit tema de jobbar med (det bør vere påstandar det er mogleg både å vere einig og ueinig i utan å ta feil).
• ei spelebrikke til kvar elev (bruk f.eks. knappar, viskeler, legoklossar i ulike fargar e.l.)
• Be gruppene trekke ein påstand. Kvar enkelt på gruppa skal vurdere kor einige dei er i påstanden og plassere brikka si i ei av rutene på brettet, frå heilt einig til heilt ueinig, utan å seie noko.
• Når alle på gruppa har plassert brikka, tar dei ei runde der kvar grunngir kvifor dei plasserte seg der.
• Sei at dei kan flytte på brikka si dersom dei har endra meining etter å ha høyrt grunnane til dei andre på gruppa, og seie noko om kva som gjorde at dei endra meining.
• Elevane gjentar prosedyren for kvar av påstandane.