1D. Oppsummering

Sei: Kva er den overordna funksjonen til posten som system? [sende brev/pakkar frå ein sendar til ein mottakar].

Sei: Posten er eit eksempel på eit kommunikasjonssystem. Felles for alle kommunikasjonssystem er at dei skal sende informasjon frå ein sendar til éin eller fleire mottakarar.

Ark 24 i PowerPoint. Be elevane skrive ned nøkkelsetninga på nøkkelsetningsarket på side 4 i elevheftet:

Funksjonen til alle kommunikasjonssystem er å sende informasjon frå ein sendar til éin eller fleire mottakarar.

Sei: Kva for delar består postsystemet av? [sendar, mottakar, brev, fly, postbud, adresse ...]

Be elevane skrive ned nøkkelsetninga:

Eit kommunikasjonssystem består av fleire delar med kvar sin funksjon. Delane jobbar saman for å overføre informasjon.

Be også elevane skrive ned grensesnitt med forklaring på begrepsarket:

grensesnitt: kopling mellom to delar i eit kommunikasjonssystem

Fagleg bakgrunn

Grensesnitt

Grensesnitt viser til kontaktflata eller grenseflata mellom to av delane i systemet og korleis dei verkar saman. Eksempel på grensesnitt:

Huda er grensesnitt mellom omverda og kroppen.
Sanseceller auga er grensesnitt mellom lys og nervesignal.
USB er grensesnitt mellom datamaskiner og anna elektronisk utstyr.

Innan kommunikasjonssystem brukar vi grensesnitt oftast om overgangen mellom system og person. Ein person kan kommunisere med ein datamaskin eller telefon på fleire ulike måtar. Vi har for eksempel skjerm, tastatur, mikrofon, høgtalar, vibrasjon eller ulike sensorar. Grensesnittet til det smarte plagget vil seie korleis plagget tar imot eller sender ut informasjon frå/ til omverda. Den trådlause sendaren vil vere grensesnittet mot resten av systemet.